Progressive Writers Multi Lingual Web Journal Society & PeerBey Web Designing Present

ഇന്റർനാഷണൽ ഫിലിം ഫെസ്റ്റിവൽ ഓഫ് കേരള- 2017 : എസ് ദുര്ഗ പ്രദർശിപ്പിക്കും


  Mahesh Panchu
  Secretary, Kerala State Chalachithra Academy
admin 01-12-2017 03:25 News 93
Play to hear this article

മലയാള സിനിമ ഇന്ന് - വിഭാഗത്തിൽ സനൽ കുമാർ ശശിധരന്റെ "എസ് ദുര്ഗ " എന്ന ചിത്രം ആദ്യമേ തന്നെ പ്രദര്ശിപ്പിക്കുവാൻ തെരെഞ്ഞെടുത്തതാണ് .പക്ഷെ അത് സംവിധായകൻ തന്നെ  പിൻവലിച്ചു .അദ്ദേഹത്തിന്റെ പുതിയ അഭ്യർത്ഥന ചലച്ചിത്ര അക്കാഡമി വീണ്ടും പരിഗണിച്ച പ്രകാരം,  മലയാള സിനിമ ഇന്ന് - വിഭാഗത്തിൽ  സെന്സര് പ്രശ്നങ്ങൾ ഒന്നും ഇല്ലെങ്കിൽ പ്രദര്ശിപ്പിക്കുന്നതാണ്. 

ഐ.എഫ്.എഫ്.കെ -2017 ചലച്ചിത്ര കലാ സ്നേഹികൾക്ക് നല്ലൊരു ദൃശ്യ വിരുന്നൊരുക്കാൻ സജ്ജമായിക്കഴിഞ്ഞു. ഏറെ നാളത്തെ ഒരു കൂട്ടം പേരുടെ സമർപ്പിത അദ്ധ്വാനം ഫലം കാണുമെന്നാണു പ്രതീക്ഷ. എഗ്ഗ്, ഹണി, മിൽക് എന്നീ ത്രയസിനിമയുടെ സ്രഷ്ടാവ് - തുർക്കി സംവിധായകൻ സെമിത്ത് കപ്ലനോഗ്ലുവിന്റെ പുതിയ ചിത്രം ‘ഗ്രെയിൻ’ ഈ മേളയിൽ ചർച്ചാവിഷയമാകുമെന്നു കരുതുന്നു. മേളയെ കുറിച്ചുള്ള ലഘു വിവരണത്തിനു മുൻപായി ഒരു ശില്പശാലയെ കുറിച്ച് ആദ്യം സൂചിപ്പിക്കട്ടെ. 

ചലച്ചിത്രകലയോട്‌ ആഭിമുഖ്യമുള്ള ഇരുപതോളം വനിതകളെ പങ്കെടുപ്പിച്ച് ഡിസംബർ 12, 13 തീയതികളിൽ ‘സിനിമയിൽ സ്ത്രീശാക്തീകരണം’ ലക്ഷ്യമാക്കി ഒരു ശില്പശാല സംഘടിപ്പിക്കുന്നു.

ചലച്ചിത്ര രംഗത്ത് സാങ്കേതിക വൈദഗ്ധ്യം, സംവിധാനം എന്നിവ സ്വായക്തമാക്കുവാൻ വനിതകൾക്ക് മാർഗ്ഗദിശയൊരുക്കുന്ന ഈ ശില്പശാല ബേസിൽ കണ്ടന്റ് മീഡിയായുമായി സഹകരിച്ചാണ്‌ നടത്തുന്നത്. ചലച്ചിത്ര നിർമ്മാണത്തിനുള്ള സാമ്പത്തിക സ്രോതസ്സുകൾ, ഫെസ്റ്റിവലുകളുടെ ഇടങ്ങൾ എന്നീ വിഷയങ്ങൾ അവതരിപ്പിക്കും. നിർമ്മാണത്തിനു സഹായകമാകുന്ന സിനിമാ പാക്കേജുകളേക്കുറിച്ച് സിനിമാ വ്യവസായ രംഗത്തുള്ളവരും ക്ലാസ്സെടുക്കും.

ചലച്ചിത്രോൽസവങ്ങളുടെ നയം, ചലച്ചിത്രോൽസവ സംഘാടനം, രാജ്യാന്തര ചലച്ചിത്രോൽസവങ്ങളിലേക്കുള്ള പ്രവേശന രീതി, ചലച്ചിത്ര വില്പന, സമാന്തര പ്രദർശനം, തിരക്കഥ സമർപ്പിക്കേണ്ട വഴികൾ, സഹകരണ അടിസ്ഥാനത്തിലുള്ള നിർമ്മാണം, വിപണന മാർഗ്ഗങ്ങൾ, മാധ്യമ ബന്ധങ്ങളുടെ ഉപയോഗം തുടങ്ങിയ വിഷയങ്ങളാണ്‌ ശില്പശാലയിൽ അവതരിപ്പിക്കുക.

ഒരു വർഷം രണ്ടായിരത്തോളം സിനിമകൾ നിർമ്മിക്കുന്ന ഇന്ത്യയിൽ വിരലിലെണ്ണാവുന്ന സൃഷ്ടികൾ മാത്രമാണ്‌ വിദേശ ചലച്ചിത്രോൽസവങ്ങളിൽ ശ്രദ്ധേയമാവുന്നത്. പ്രമേയത്തിന്റെ നൂതനത്വം, ഔന്നത്യം, സാധുത, സാർവ്വലൗകികത തുടങ്ങിയവ പ്രതിപാദിക്കുന്നു. നിർമ്മാണ സാഹചര്യത്തോടൊപ്പം പ്രചരണ-പ്രദർശന-വിപണി-വില്പന സംബന്ധിച്ച നയതന്ത്രങ്ങളുടെ ഏകോപനം മനസ്സിലാക്കാനും ഈ ശില്പശാല ഉപകരിക്കുമെന്ന് പ്രതീക്ഷിക്കുന്നു.

പ്രേക്ഷകര്‍ക്ക് ദൃശ്യവിരുന്നൊരുക്കി നാല്‍പതോളം ചിത്രങ്ങളുടെ ആദ്യപ്രദര്‍ശനം

കേരള രാജ്യാന്തര ചലച്ചിത്രമേള 36 ചിത്രങ്ങളുടെ ആദ്യപ്രദര്‍ശന വേദിയാകും. ഇവയില്‍ നാല് ചിത്രങ്ങളുടേത് ആഗോളതലത്തിലെ ആദ്യപ്രദര്‍ശനമാണ്. 
ചലച്ചിത്രമേളയുടെ ഉദ്ഘാടന ചിത്രം ഇന്‍സള്‍ട്ട് ഇന്ത്യയില്‍ തന്നെ ആദ്യമായാണ് പ്രദര്‍ശിപ്പിക്കുന്നത്. മത്സരവിഭാഗത്തിലെ എട്ട് ചിത്രങ്ങളുടെ ആദ്യ പ്രദര്‍ശനമാണ് നടക്കുന്നത്.  മത്സരവിഭാഗത്തിലെ മലയാള സാന്നിദ്ധ്യമായ രണ്ടു പേര്‍, ഏദന്‍ എന്നീ ചിത്രങ്ങളുടെ ആഗോള റീലിസിന് ചലച്ചിത്രമേള വേദിയാകും. തായ് ചിത്രം മലില-ദ ഫെയര്‍വെല്‍ ഫ്‌ളവര്‍, കസാഖ് ചിത്രം റിട്ടേണി, സ്പാനിഷ് ചിത്രം സിംഫണി ഓഫ് അന, മംഗോളിയയില്‍ നിന്നുള്ള ദ വേള്‍ഡ് ഓഫ് വിച്ച് വി ഡ്രീം ഡസ് നോട്ട് എക്‌സിസ്റ്റ്, ഇറാന്‍ ചിത്രം വൈറ്റ് ബ്രിഡ്ജ്, ഇംഗ്ലീഷ് ചിത്രം ഗ്രെയ്ന്‍ എന്നിവയാണ് മത്സരവിഭാഗത്തില്‍ ആദ്യപ്രദര്‍ശനത്തിനെത്തുന്നവ.
മലയാള സിനിമ ഇന്ന് വിഭാഗത്തില്‍ ശ്രീകൃഷ്ണന്‍ കെ.പി സംവിധാനം ചെയ്ത നായിന്റെ ഹൃദയത്തിന്റെയും ആദ്യപ്രദര്‍ശനവേദി കൂടിയാകും മേള. ലോകസിനിമാ വിഭാഗത്തില്‍ പ്രദര്‍ശിപ്പിക്കുന്ന ഇരുപതോളം ചിത്രങ്ങളുടെ ആദ്യപ്രദര്‍ശന വേദിയായും ഇത്തവണത്തെ ചലച്ചിത്രമേള മാറും. 
ഇന്ത്യന്‍ സിനിമ ഇന്ന് വിഭാഗത്തില്‍ നിഖില്‍ അലൂഗ് ചിത്രം ഷെയ്ഡ്, സഞ്ജീവ് ധേ ചിത്രം ത്രീ സ്‌മോക്കിംഗ് ബാരല്‍സ്, ഫോക്കസ് ഓണ്‍ ബ്രസീല്‍ വിഭാഗത്തില്‍ സ്‌റ്റോറീസ് ദാറ്റ് അവര്‍ സിനിമ ഡിഡ് നോട്ട് ടെല്‍, ഫിലിംസ് ഓണ്‍ ഐഡന്റിറ്റി ആന്റ് സ്‌പെയ്‌സ് വിഭാഗത്തിലെ മലേഷ്യന്‍ ചിത്രം അക്വിരാത്, ഫിലിം മേക്കര്‍ ഇന്‍ ഫോക്കസ് വിഭാഗത്തിലെ സീസണ്‍ ഇന്‍ ഫ്രാന്‍സ്, ജൂറി ചിത്രം സ്വായിങ് വാട്ടര്‍ലില്ലി എന്നിവയാണ് ആദ്യ പ്രദര്‍ശനത്തിനെത്തുന്ന മറ്റു ചിത്രങ്ങൾ.

പ്രേക്ഷക പുരസ്‌കാരത്തിന് 15 വയസ്സ് 

കേരള രാജ്യാന്തര ചലച്ചിത്രമേളയുടെ പ്രഥമവും പ്രധാനവുമായ പരിഗണന എന്നും അതിന്റെ പ്രേക്ഷകരാണ്. പ്രേക്ഷകരെ കേന്ദ്രസ്ഥാനത്ത് പ്രതിഷ്ഠിക്കുന്ന ഈ സംസ്‌കാരം തന്നെയാണ് ഐ.എഫ്.എഫ്.കെ.യെ വ്യത്യസ്തമാക്കുന്നതും.
ചലച്ചിത്രോത്സവ സംഘാടനം അക്കാദമി ഏറ്റെടുത്ത ആദ്യ വര്‍ഷം തന്നെ ഇന്ന് പ്രേക്ഷകര്‍ ഏറ്റവും കൂടുതല്‍ കാത്തിരിക്കുന്ന മത്സരവിഭാഗം ആരംഭിച്ചു. അന്താരാഷ്ട്ര മാനദണ്ഡങ്ങള്‍ പാലിച്ചു നടത്തിയ സംഘാടനം വഴി ഫിലിം ഫെസ്റ്റിവലുകളുടെ അന്താരാഷ്ട്ര അക്രഡിറ്റേഷന്‍ ഏജന്‍സിയായ ഫിയാഫിന്റെ (എഫ്.ഐ.എ.പി.എഫ്) കോംപറ്റിറ്റീവ് (സ്‌പെഷ്യലൈസ്ഡ്) അക്രഡിറ്റേഷന്‍, അക്കാദമി നേടിയെടുത്തു. ഇതോടെ ലോകമെമ്പാടുമുള്ള സിനിമാ പ്രേമികളുടെ കലണ്ടറില്‍ ഐ.എഫ്.എഫ്.കെ പ്രതിഷ്ഠിക്കപ്പെട്ടു. സിനിമയെ ഗൗരവത്തോടെ സമീപിക്കുന്ന ഒരു പ്രേക്ഷകസമൂഹത്തിന്റെ വളര്‍ച്ചയ്ക്കും ഐ.എഫ്.എഫ്.കെ വേദിയായി. പ്രേക്ഷക സമൂഹത്തിനുള്ള അംഗീകാരത്തിന്റെ ഭാഗമായി 2002ല്‍ അക്കാദമി പ്രേക്ഷക പുരസ്‌കാരം ഏര്‍പ്പെടുത്തി. 'ഡാനി' (ടി വി ചന്ദ്രന്‍) ആദ്യ പ്രേക്ഷക പുരസ്‌കാരത്തിന് അര്‍ഹമായി. 2005ല്‍ ഡെലിഗേറ്റുകള്‍ അവാര്‍ഡിനായി തിരഞ്ഞെടുത്ത 'കെകെക്‌സിലി: മൗണ്ടന്‍ പട്രോള്‍' മികച്ച സംവിധാനത്തിനുള്ള രജത ചകോരത്തിനും തിരഞ്ഞെടുക്കപ്പെട്ടു. ഇത്തരം പ്രേക്ഷക സമീപനങ്ങളോടുള്ള ആദരസൂചകമായി ഇന്ത്യയില്‍ തന്നെ ആദ്യമായി ഡെലിഗേറ്റുകള്‍ക്ക് സൗജന്യ യാത്രാ സൗകര്യമൊരുക്കി ഫെസ്റ്റിവല്‍ ഓട്ടോ സംവിധാനം 2007ല്‍ അക്കാദമി ഏര്‍പ്പെടുത്തി. ഐ.എഫ്.എഫ്.കെയെ മാതൃകയാക്കി തുടര്‍ന്ന് ഗോവന്‍ അന്താരാഷ്ട്ര ചലച്ചിത്രമേളയിലും ഈ സംവിധാനം ഏര്‍പ്പെടുത്തുകയുണ്ടായി.
ഇരുപത്തി രണ്ടാമത് ഐ.എഫ്.എഫ്.കെ യോടെ പ്രേക്ഷക പുരസ്‌കാരത്തിന് 15 ഉം ഫെസ്റ്റിവല്‍ ഓട്ടോയ്ക്ക് 10 ഉം വയസ്സ് തികയുകയാണ്. ഇത്തവണ ഭിന്നശേഷിക്കാര്‍ക്കും മുതിര്‍ന്ന പൗരര്‍ക്കുമായി പ്രത്യേകസൗകര്യങ്ങള്‍ ഒരുക്കിയിട്ടുണ്ട്. ഗൗരവതരമായ സിനിമാസ്വാദനത്തിന് സഹായകമാകുംവിധം ഡെലിഗേറ്റുകളുടെ സുരക്ഷാസൗകര്യങ്ങള്‍ക്ക് പ്രത്യേക ശ്രദ്ധ നല്‍കാനും തീരുമാനമായിട്ടുണ്ട്.

പ്രേക്ഷകഹൃദയം കീഴടക്കാന്‍ 'ദ യങ് കാള്‍ മാര്‍ക്സ്'

ബര്‍ലിന്‍ ചലച്ചിത്രമേള ഉള്‍പ്പടെ നിരവധി രാജ്യാന്തര മേളകളില്‍ പ്രേക്ഷകപ്രീതി പിടിച്ചു പറ്റിയ 'ദ യങ് കാള്‍ മാര്‍ക്സ് ' കേരള രാജ്യാന്തര ചലച്ചിത്രമേളയിലും. ലോക സിനിമാ വിഭാഗത്തിലാണ്  ഈ ചിത്രം  പ്രദര്‍ശിപ്പിക്കുന്നത്. മാര്‍ക്സിന്റെ  ജീവിതത്തില്‍ ഫ്രഡറിക് ഏംഗല്‍സുമായുള്ള കൂടിക്കാഴ്ച മുതല്‍ കമ്യൂണിസ്റ്റ് മാനിഫെസ്റ്റോയുടെ രചന വരെയുള്ള യൗവ്വന കാലമാണ് ചിത്രത്തിന്റെ പ്രമേയം.
പത്തൊമ്പതാം നൂറ്റാണ്ടില്‍  യൂറോപ്പിലെ  അധ്വാനവര്‍ഗം നേരിട്ട നരകയാതനകള്‍ക്കാണ് ഇറ്റാലിയന്‍ സംവിധായകനായ റൗള്‍ പെക്ക് അഭ്ര കാഴ്ചയൊരുക്കുന്നത്. ദാരിദ്ര്യവും മുതലാളി വര്‍ഗ്ഗ ചൂഷണവും  ഇരകളാക്കിയ തൊഴിലാളികളുടെ ജീവിതം 1842 മുതല്‍ 1847 വരെയുള്ള മാര്‍ക്‌സിന്റെ ജീവിതകഥയ്ക്ക് സമാന്തരമായി സംവിധായകന്‍ അനാവരണം ചെയ്യുന്നു. ചിത്രത്തിലെ നായക കഥാപാത്രത്തെ ഓഗസ്റ്റ് ഡയലും നായികയെ വിക്കി ക്രിബ്‌സും അവതരിപ്പിക്കുന്നു. 
26 കാരനായ മാര്‍ക്സും ഭാര്യ ജെന്നിയുമായുള്ള കുടുബജീവിതവും  മാര്‍ക്സും ഏംഗല്‍സും തമ്മിലുള്ള വ്യക്തിബന്ധവും സൂഷ്മതയോടെയാണ് ചിത്രത്തില്‍ അവതരിപ്പിക്കപ്പെടുന്നത്.ലോകത്തെ അധ്വാനവര്‍ഗ സിദ്ധാന്തം പഠിപ്പിച്ച  കാഴ്ചപ്പാടുകളെയും കമ്മ്യൂണിസം പിറവിയെടുത്ത സാഹചര്യങ്ങളെയും അതിശയോക്തികളില്ലാതെ കഴിഞ്ഞ മാര്‍ച്ചില്‍ പുറത്തിറങ്ങിയ 'ദ യങ് കാള്‍ മാര്‍ക്സ്' ചിത്രീകരിക്കുന്നു. പാസ്‌കല്‍ ബോണിറ്റ്സര്‍ തിരക്കഥയൊരുക്കിയ ഈ ചിത്രം ഗോവ അന്താരാഷ്ട്ര ചലച്ചിത്രമേളയില്‍ നിറഞ്ഞ കൈയടിയോടെയാണ് പ്രേക്ഷകര്‍ സ്വീകരിച്ചത്.

ഉത്ഘാടന  ചിത്രം അറബ് ജനതയുടെ അഭയാര്‍ത്ഥി ജീവിതവുമായി 'ദി  ഇന്‍സള്‍ട്ട്' 

അറബ് രാജ്യങ്ങളിലെ അഭയാര്‍ത്ഥി ജനതയുടെ പുത്തന്‍കാഴ്ചകളുമായി എത്തുന്ന 'ദി ഇന്‍സള്‍ട്ട്' രാജ്യാന്തര ചലച്ചിത്രമേളയില്‍  ഉദ്ഘാടന ചിത്രമാകും. ഡിസംബര്‍ 8 ന് നിശാഗന്ധി ഓഡിറ്റോറിയത്തിലാണ് ചിത്രത്തിന്റെ പ്രദര്‍ശനം. ലെബനന്‍ സംവിധായകനായ സിയാദ് ദൗയിരി സംവിധാനം ചെയ്ത ഈ ചിത്രം വ്യക്തികള്‍ക്കിടയിലെ ചെറിയ സംഘര്‍ഷങ്ങള്‍ ഒരു രാഷ്ട്രത്തിന്റെ നിയമ വ്യവസ്ഥയെ എങ്ങനെ ചോദ്യം ചെയ്യുന്നുവെന്ന് ചിത്രീകരിക്കുന്നു. അന്താരാഷ്ട്ര  സംഘര്‍ഷങ്ങളിലേക്ക് അത് എങ്ങനെ രൂപാന്തരപ്പെടുന്നുവെന്ന് ചിത്രം അന്വേഷിക്കുന്നു.  കുടിയേറ്റ ജീവിതമാണ് ഈ മേഖലയിലെ സംഘര്‍ഷങ്ങളുടെ പ്രധാന കാരണമെന്നാണ് ചിത്രത്തിന്റെ കണ്ടെത്തല്‍. 
മതപരവും പ്രാദേശികവുമായ സമകാലിക വിഷയങ്ങളും 'ദി ഇന്‍സള്‍ട്ട്' അനാവരണം ചെയ്യുന്നു. വെനീസ് രാജ്യന്തര ചലച്ചിത്ര മേളയില്‍ മത്സര വിഭാഗത്തില്‍ പ്രദര്‍ശിപ്പിച്ച ഈ സിനിമയിലെ അഭിനയത്തിന് കമേല്‍ എല്‍ ബാഷയ്ക്ക് മികച്ച നടനുള്ള പുരസ്‌കാരം ലഭിച്ചിരുന്നു. ഓസ്‌കര്‍ നോമിനേഷനും ചിത്രം കരസ്ഥമാക്കിയിട്ടുണ്ട്. കാന്‍ ചലച്ചിത്ര മേളയില്‍ ചാലൈസ് പുരസ്‌കാരം നേടിയ 'വെസ്റ്റ് ബെയ്റൂട്ട്', 'ലൈല സെയ്സ് ', 'സ്ലീപ്പര്‍ സെല്‍ ', 'ദി അറ്റാക്ക് ', 'റിപ്പബ്ലിക്കന്‍ ഗാംഗ്‌സ്റ്റേര്‍സ് ' തുടങ്ങിയവയാണ് സിയാദ് ദൗയിരിയുടെ  ചിത്രങ്ങള്‍.

Similar Post You May Like

Recent Post

Blog Archive